ಕರ್ನಾಟಕ ರಿಯಲ್ ಎಸ್ಟೇಟ್ ನಿಯಂತ್ರಣ ಪ್ರಾಧಿಕಾರ (K-RERA) 2025ರ ನವೆಂಬರ್ 7ರಂದು ಮಹತ್ವದ ತೀರ್ಪು ನೀಡಿದ್ದು, ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ) ತನ್ನ ನಾಡಪ್ರಭು ಕೆಂಪೇಗೌಡ ಲೇಔಟ್ (NPKL) ಯೋಜನೆಗೆ ಸಂಬಂಧಿಸಿದಂತೆ ರಿಯಲ್ ಎಸ್ಟೇಟ್ ‘ಪ್ರಮೋಟರ್’ ಆಗಿದೆ ಎಂದು ಘೋಷಿಸಿದೆ. ಈ ತೀರ್ಪು ಸಾವಿರಾರು ಸೈಟ್ ಹಂಚಿಕೆದಾರರಿಗೆ ನ್ಯಾಯ ದೊರಕಿಸಲು ದಾರಿ ಮಾಡಿಕೊಡಲಿದೆ.
ತೀರ್ಪಿನ ಮುಖ್ಯಾಂಶಗಳು
- ಬಿಡಿಎ ‘ಪ್ರಮೋಟರ್’ ಆಗಿದೆ: ರಿಯಲ್ ಎಸ್ಟೇಟ್ (ನಿಯಂತ್ರಣ ಮತ್ತು ಅಭಿವೃದ್ಧಿ) ಕಾಯ್ದೆ, 2016ರ ಅಡಿಯಲ್ಲಿ ಬಿಡಿಎ ಕೂಡ ಪ್ರಾಮೋಟರ್ ಆಗಿ ಪರಿಗಣನೆಗೆ ಒಳಪಡುವುದಾಗಿ ಕೆ-ರೇರಾ ಸ್ಪಷ್ಟಪಡಿಸಿದೆ.
- ನೋಂದಣಿ ಕಡ್ಡಾಯ: ನಾಡಪ್ರಭು ಕೆಂಪೇಗೌಡ ಲೇಔಟ್ ಯೋಜನೆಯನ್ನು 2 ವಾರಗಳೊಳಗೆ ರೇರಾ ಯೋಜನೆಯಾಗಿ ನೋಂದಾಯಿಸಬೇಕು ಎಂದು ಆದೇಶಿಸಲಾಗಿದೆ.
- ಮಾಹಿತಿ ಅಪ್ಲೋಡ್ ಕಡ್ಡಾಯ: ಯೋಜನೆಯ ಎಲ್ಲಾ ದಾಖಲೆಗಳು — ಅನುಮೋದಿತ ನಕ್ಷೆಗಳು, ಪ್ರಗತಿ ವರದಿಗಳು, ಹಣಕಾಸು ವಿವರಗಳು — ರೇರಾ ಪೋರ್ಟಲ್ನಲ್ಲಿ ಅಪ್ಲೋಡ್ ಮಾಡಬೇಕು.
- ಮಾರಾಟ ನಿಷೇಧ: ನೋಂದಣಿ ಮುಗಿಯುವವರೆಗೆ ಯಾವುದೇ ಸೈಟ್ ಮಾರಾಟ, ಜಾಹೀರಾತು ಅಥವಾ ಮೂರನೇ ವ್ಯಕ್ತಿಗೆ ಹಕ್ಕು ನೀಡುವುದು ನಿಷಿದ್ಧ.
- ದಂಡದ ಎಚ್ಚರಿಕೆ: ಕಾಯ್ದೆಯ ಸೆಕ್ಷನ್ 59(1) ಅಡಿಯಲ್ಲಿ ದಂಡ ವಿಧಿಸುವ ಬಗ್ಗೆ ಕಾರಣ ತೋರಿಸದಿದ್ದರೆ ಕ್ರಮ ಕೈಗೊಳ್ಳಲಾಗುವುದು ಎಂದು ಪ್ರಾಧಿಕಾರ ಎಚ್ಚರಿಕೆ ನೀಡಿದೆ.
10,000ಕ್ಕೂ ಹೆಚ್ಚು ಸೈಟ್ ಹಂಚಿಕೆದಾರರು 2016–2019ರ ನಡುವೆ ಪೂರ್ಣ ಪಾವತಿ ಮಾಡಿ ನೋಂದಣಿ ಮಾಡಿಕೊಂಡಿದ್ದರು. ಆದರೆ, ರಸ್ತೆ, ನೀರು, ವಿದ್ಯುತ್, ಒಳಚರಂಡಿ ಮುಂತಾದ ಮೂಲಸೌಕರ್ಯಗಳಿಲ್ಲದೆ ವರ್ಷಗಳ ಕಾಲ ನಿರೀಕ್ಷೆಯಲ್ಲಿ ಇದ್ದರು. ಹಂಚಿಕೆದಾರರು ಆಸ್ತಿ ತೆರಿಗೆ ಪಾವತಿಸುತ್ತಿದ್ದರೂ, ವಾಸಿಸಲು ಸಾಧ್ಯವಾಗದ ಸ್ಥಿತಿಯಲ್ಲಿದ್ದರು. ಬಿಡಿಎ ತನ್ನನ್ನು ಸಾಂವಿಧಾನಿಕ ಸಂಸ್ಥೆ ಎಂದು ಹೇಳಿ, ರೇರಾ ನಿಯಮಗಳಿಗೆ ಹೊರತಾಗಿರುವೆವು ಎಂದು ವಾದಿಸಿತ್ತು. ಆದರೆ ಕೆ-ರೇರಾ ಈ ವಾದವನ್ನು ತಳ್ಳಿಹಾಕಿ, ಸಾರ್ವಜನಿಕರಿಂದ ಹಣ ಸಂಗ್ರಹಿಸಿ ಯೋಜನೆಗಳನ್ನು ಮಾರಾಟ ಮಾಡುತ್ತಿರುವ ಯಾವುದೇ ಸಂಸ್ಥೆ ಪ್ರಾಮೋಟರ್ ಆಗಿದೆ ಎಂಬುದಾಗಿ ತೀರ್ಮಾನಿಸಿದೆ.
ಈ ತೀರ್ಪು ಹಂಚಿಕೆದಾರರಲ್ಲಿ ಆಶಾಭಾವನೆ ಮತ್ತು ನ್ಯಾಯದ ಭರವಸೆ ಮೂಡಿಸಿದೆ. ಹಲವರು ಈ ತೀರ್ಪು ಮೂಲಕ ತಮ್ಮ ಹಕ್ಕುಗಳನ್ನು ಕಾಯ್ದುಕೊಳ್ಳಲು ಸಾಧ್ಯವಾಗಲಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
