ನವದೆಹಲಿ: ಆನ್ಲೈನ್ ಮೂಲಕ ಕ್ಯಾಬ್ ಅಥವಾ ರೈಡ್ ಬುಕ್ ಮಾಡುವ ಪ್ರಯಾಣಿಕರಿಗೆ ಕೇಂದ್ರ ಸರ್ಕಾರ ಮಹತ್ವದ ಪರಿಹಾರ ನೀಡಿದೆ. ರೈಡ್ ಬುಕ್ ಮಾಡುವ ಮುನ್ನ ಅಥವಾ ರೈಡ್ ಪೂರ್ಣಗೊಳ್ಳುವ ಮೊದಲು ಪ್ರಯಾಣಿಕರಿಗೆ ಟಿಪ್ಸ್ ನೀಡುವಂತೆ ಪ್ರೇರೇಪಿಸುವ ಯಾವುದೇ ಆಯ್ಕೆ, ಸಂದೇಶ ಅಥವಾ ಪಾಪ್ಅಪ್ಗಳನ್ನು ತೆಗೆದುಹಾಕುವಂತೆ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ರೈಡ್ ಅಗ್ರಿಗೇಟರ್ಗಳಿಗೆ ಸೂಚಿಸಿದೆ.
ರೈಡ್ಗೂ ಮುನ್ನ ಟಿಪ್ಸ್ ಕೇಳುವಂತಿಲ್ಲ
ಓಲಾ, ಉಬರ್, ರ್ಯಾಪಿಡೋ ಸೇರಿದಂತೆ ಆ್ಯಪ್ ಆಧಾರಿತ ರೈಡ್ ಸೇವೆಗಳಲ್ಲಿ ಪ್ರಯಾಣಿಕರು ರೈಡ್ಗಾಗಿ ಹೆಚ್ಚುವರಿ ಹಣವನ್ನು ಟಿಪ್ ರೂಪದಲ್ಲಿ ಮುಂಗಡವಾಗಿ ನೀಡುವ ಆಯ್ಕೆಯನ್ನು ಕೆಲವು ಸಂದರ್ಭಗಳಲ್ಲಿ ನೋಡುತ್ತಿದ್ದರು.
ಹೆಚ್ಚುವರಿ ಟಿಪ್ಸ್ ನೀಡಿದರೆ ರೈಡ್ ಬೇಗ ಸಿಗಬಹುದು ಅಥವಾ ಚಾಲಕರು ರೈಡ್ ಸ್ವೀಕರಿಸುವ ಸಾಧ್ಯತೆ ಹೆಚ್ಚಬಹುದು ಎಂಬ ರೀತಿಯ ಸೂಚನೆಗಳು ಪ್ರಯಾಣಿಕರ ಮೇಲೆ ಹೆಚ್ಚುವರಿ ಹಣ ಪಾವತಿಸುವ ಒತ್ತಡವನ್ನು ಸೃಷ್ಟಿಸಬಹುದು ಎಂಬ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಟಿಪ್ಸ್ ಯಾವಾಗ ನೀಡಬಹುದು?
Motor Vehicle Aggregator Guidelines, 2025ರ Clause 14.15 ಪ್ರಕಾರ, ಚಾಲಕರಿಗೆ ಟಿಪ್ಸ್ ನೀಡುವ ಆಯ್ಕೆ ಸಂಪೂರ್ಣ ಸ್ವಯಂಪ್ರೇರಿತವಾಗಿರಬೇಕು. ಆದರೆ ಈ ಆಯ್ಕೆ ರೈಡ್ ಪೂರ್ಣಗೊಂಡ ನಂತರ ಮಾತ್ರ ಪ್ರಯಾಣಿಕರಿಗೆ ಕಾಣಿಸಬೇಕು.
ರೈಡ್ ಬುಕ್ ಮಾಡುವ ಸಮಯದಲ್ಲಿ, ರೈಡ್ ಆರಂಭವಾಗುವ ಮುನ್ನ ಅಥವಾ ಪ್ರಯಾಣದ ಮಧ್ಯದಲ್ಲಿ ಟಿಪ್ಸ್ ನೀಡುವ ಆಯ್ಕೆಯನ್ನು ಆ್ಯಪ್ನಲ್ಲಿ ಒದಗಿಸುವಂತಿಲ್ಲ. ಟಿಪ್ಸ್ ನೀಡಿದರೆ ಅದರ ಸಂಪೂರ್ಣ ಮೊತ್ತ ಚಾಲಕರಿಗೆ ಸೇರಬೇಕು ಮತ್ತು ಅಗ್ರಿಗೇಟರ್ ಅದರಲ್ಲಿ ಯಾವುದೇ ಕಡಿತ ಮಾಡಬಾರದು ಎಂದು ಮಾರ್ಗಸೂಚಿಯಲ್ಲಿ ಹೇಳಲಾಗಿದೆ.
ಗ್ರಾಹಕರಿಗೆ ಏನು ಬದಲಾವಣೆ?
ಇನ್ನು ಮುಂದೆ ಕ್ಯಾಬ್ ಬುಕ್ ಮಾಡುವಾಗ “Advance Tip” ಅಥವಾ ಇದೇ ರೀತಿಯ ಯಾವುದೇ ಟಿಪ್ ಆಯ್ಕೆಯನ್ನು ತೋರಿಸುವಂತಿಲ್ಲ. ಪ್ರಯಾಣಿಕರು ರೈಡ್ ಪೂರ್ಣಗೊಂಡ ಬಳಿಕ ಚಾಲಕರ ಸೇವೆ ತೃಪ್ತಿಕರವಾಗಿದ್ದರೆ ತಮ್ಮ ಇಚ್ಛೆಯಂತೆ ಟಿಪ್ಸ್ ನೀಡಬಹುದು.
ಈ ಕ್ರಮದಿಂದ ಹೆಚ್ಚುವರಿ ಹಣ ನೀಡಿದರೆ ಮಾತ್ರ ರೈಡ್ ಬೇಗ ಸಿಗುತ್ತದೆ ಎಂಬ ಭಾವನೆ ಅಥವಾ ಒತ್ತಡ ಕಡಿಮೆಯಾಗುವ ನಿರೀಕ್ಷೆಯಿದೆ. ಗ್ರಾಹಕರು ನಿಗದಿತ ರೈಡ್ ದರದ ಆಧಾರದ ಮೇಲೆ ಸೇವೆ ಪಡೆಯಲು ಸಾಧ್ಯವಾಗಲಿದೆ.
ಗ್ರಾಹಕರ ಹಿತಾಸಕ್ತಿಗೆ ಒತ್ತು
ರೈಡ್-ಹೇಲಿಂಗ್ ಆ್ಯಪ್ಗಳಲ್ಲಿ ಟಿಪ್ಸ್ ನೀಡುವ ವ್ಯವಸ್ಥೆ ಸಂಪೂರ್ಣ ಸ್ವಯಂಪ್ರೇರಿತವಾಗಿರಬೇಕು ಮತ್ತು ಗ್ರಾಹಕರನ್ನು ನೇರವಾಗಿ ಅಥವಾ ಪರೋಕ್ಷವಾಗಿ ಹೆಚ್ಚುವರಿ ಹಣ ಪಾವತಿಸಲು ಪ್ರೇರೇಪಿಸುವ ಯಾವುದೇ ವ್ಯವಸ್ಥೆ ಇರಬಾರದು ಎಂಬುದು ಸರ್ಕಾರದ ನಿಲುವಾಗಿದೆ.
ಹೀಗಾಗಿ, ಕ್ಯಾಬ್ ಬುಕ್ಕಿಂಗ್ ವೇಳೆ ಟಿಪ್ಸ್ ನೀಡುವ ಮೂಲಕ ರೈಡ್ ಪಡೆಯುವ ಸಾಧ್ಯತೆಯನ್ನು ಹೆಚ್ಚಿಸಿಕೊಳ್ಳುವ ಆಯ್ಕೆಗೆ ಈಗ ಕಡಿವಾಣ ಬೀಳಲಿದೆ. ರೈಡ್ ಮುಗಿದ ಬಳಿಕ ಮಾತ್ರ ಚಾಲಕರಿಗೆ ಟಿಪ್ಸ್ ನೀಡುವ ಅವಕಾಶ ಇರಲಿದೆ.
